「懷孕唔可以化妝」聽得多，好多準媽媽都心慌慌，唔通懷孕就等於要日日素顏？仲要係10個月咁耐！點算好呀？
的確好多化妝品都含有重金屬、激素、化學香精等有毒物質，有機會影響BB，但貪靚嘅我哋，梗係唔需要咁慘，成10個月要素顏見人啦 ，大住肚都可以keep住靚。
由於懷孕期間皮膚比較容易過敏，喺化妝第一步，即係搽防曬時，可選用含Zinc Oxide或Titanium Dioxide嘅物理性防曬成份產品。坊間仲有啲有潤色功能嘅礦物防曬，對BB安全之餘，仲連粉底都唔使用，更減輕皮膚負擔，無咁易俾厚重嘅粉底焗到爆瘡！
選用產品時，要留意對羥基苯甲酸酯類Parabens成份。Parabens 係經常添加喺化妝品、防曬乳和唇膏既防腐劑。有研究指出，這類防腐劑與嬰兒嘅發育、生殖、神經同免疫系統等都有機會造成影響，包括：性早熟、精神疾病、乳癌同卵巢癌嘅風險。
另外，亦要留意甲醛Formaldehyde呢個成份。甲醛常見於指甲油、睫毛膠和髮膏等用品當中，有研究指出甲醛具有致癌風險，目前已經被國際癌症研究機構(IARC)列為人類致癌物。市面上甚至有有機食物成份嘅甲油，食咗落肚都唔怕，仲用番梘就洗得甩！
